چوخ دا چتين دئييل

پوست مدرن اولماق

م. خزرلی

بیر آز لومپنلیییمیزی باشیمیزدان آتساق

بیر آز اؤزوموزو آتیب توتساق

چوخ دا چتين دئييل

پوست مدرن اولماق

ديليمیزی اییب

حرفلري اَيري ـ مويرو يازساق

سيندیراجاییق هر نه­يي

چاينيكلري

فينجانلاري

جانلاري

ساعاتلارداكي عقربه­لري

سیندیراجاییق بوتون قاليبلري

سينديراجاییق اتيميزي تؤكن سوموكلري

سويوناجاییق جيندير مينديرلاري

سوياجاییق قيلاسه قابيغينيزي

لومبلن لوت اولوب

آلاجاییق ميصراعلاريميزين قاشينی

اؤزوموزو هر مودا سالارکن

دییشه­جه­ییک مودئملرينيزي

فورمت ائده­جه­ییک درايولاريميزي

اونيفورملارين آلتيندان چيخيب

فورملاريميزي تاپاجاییق

اورك ـ موره­يي

گولو ـ بولبولو

باشينا بوشلاييب

بير آز دريندن نفس چكرکن

درينله­شه­جه­ییک

بورنوموزا سو دولسا دا

بوغدو – بوغدو اوینایاجاییق

آچاجاییق گؤزوموزو سویون آلتیندا

آخاجاییق آخیلمایان یئرلره

چيخاجاییق اؤزوموزدن

بيته­جك باشيمیزدان

ياشيل، ساري، قيرميزي، سؤزلر

پوليس فيشديراق چالسا دا

 دايانمایاجاییق

قورخمایاجاییق

هر نه دوزه­­له­جک

یولوموزدا قویولار اولاجاق

داش آتاجاییق

یوخولاریندان دیسکینه­جکلر

رومانتیک قورباغالار

سونرا دالی قاییدیب

بابالاريميزي قبيردن خورتلادارکن

بير ـ بيرينين جانينا سالاجاییق

دده­میزین قوپوزونو سیندیریب

ایسپان گیتاراسین وئره­جه­ییک الینه

دده­میز یئنی هاوا چالماغی باجاراجاق

اژدر عمی لامبادا اوینایاجاق

قوچاق نبی­نین ائشمه بوغلارینی وورساق دا

قورخمایین قاچاق دوشسه ده

قوچاق قالاجاق

کور اوغلونو آتیندان دوشوردوب

ماکزیمایا میندیره بیلمه­سک ده

هئچ اولماسا 59«پیکان»ا میندیرمه­لییک

اینجیمه­سین آت اوستونده قوچ کور اوغلو

هر نه­يين جانين آلاجاییق

يئني­دن جانلادیب

يئني­دن جانلاناجاییق

 Çöx da çətin deyil

Postmodern olmaq

M. Xəzərli

Bir az limpenliyimizi başımızdan atsaq

Bir az özümüzü atıb tutsaq

Çöx da çətin deyil

Postmodern olmaq

Dilimizi əyib

Hərfləri əyri – müyrü yazsaq

Sındıracayıq hər nəyi

Çaynikləri

Fincanları

Canları

Saatlardakı əqrəbələri

Sındıracayıq bütün qalibləri

Sındıracayıq ətimizi tökən sümükləri

Soyunacayıq cındır – mındırları

Soyacayıq qilasə qabığımızı

Lümbələn lüt olub

Alacayıq misralarımızın qaşını

Özümüzü hər moda salarkən

Dəyişəcəyik modemlərimizi

"Format" edəcəyik "Drive"larımızı

"Uniform"ların altından çıxıb

Formalarımızı tapacayıq

Ürək – mürəyi

Gülü – bülbülü

Başına boşlayıb

Bir az dərindən nəfəs çəkərkən

Dərinləşəcəyik

Burnumuza su dolsa da

Boğdu – boğdu oynayacayıq

Açacayıq gözümüzü suyun altında

Axacayıq axılmayan yerlərə

Çıxacayıq özümüzdən

Bitəcək başımızdan

Yaşıl, sarı, qırmızı sözlər

Polis fışdıraq çalsa da

Dayanmayacayıq

Qorxmayacayıq

Hər nə düzələcək

Yolumuzda quyular olacaq

Daş atacayıq

Yuxularından diskinəcəklər

Rumantik qurbağalar

Sonra dalı qayıdıb

Babalarımızı qəbirdən xortladarkən

Bir – birinin canına salacayıq

Dədəmizin qopuzunu sındırıb

İspan gitarasın verəcəyik əlinə

Dədəmiz yeni hava çalmağı bacaracaq

əjdər əmi lambada oynayacaq

qoçaq nəbinin eşmə buğlarını vursaq da

qorxmayın qaçaq düşsə də

qoçaq qalacaq

kor oğlunu atından düşürdüb

"Makzima"ya mindirə bilməsək də

Heç olmasa 59 "Peykan"a mindirməliyik

İnciməsin at üstündə Qoçkoroğlu

Hər nəyin cənını alacayıq

Yenidən canladıb

Yenidən canlanacayıq